Кездесу барысында Ақтөбе облысының әкімі Асхат Шахаров пен “QazaqGaz” ҰК” АҚ басқарма төрағасы Санжар Жаркешов газ тарату желілерін жаңарту және өңірдің жылыту маусымына дайындығын талқылады.
QazaqGaz мәліметінше, облысты газдандыру деңгейі 95,7 пайызға жеткен. "Бұл Үкіметтің, әкімдіктің және газ қызметкерлерінің жүйелі және келісілген жұмысының нәтижесі. Ендігі біздің ортақ міндетіміз - тұрақтылықты қамтамасыз ету, өңірдің өсіп келе жатқан қажеттіліктерін ескере отырып, газбен жабдықтау жүйесін жаңғырту және одан әрі дамыту, - деді Санжар Жаркешов.
Инвестициялық бағдарлама аясында «QazaqGaz» компаниялар тобы Ақтөбеде сонау 1976 жылы пайдалануға берілген орта қысымды газ құбырын жаңғырту жобасын жүзеге асыруда. Қайта қалпына келтірілген желілердің жалпы ұзындығы 8,7 шақырымды құрайды, оның 5,5 шақырымнан астамы қайта тартылған.
Жұмыстарды жыл соңына дейін аяқтау жоспарлануда. Жаңартылғаннан кейін газ құбыры басқа желілермен байланыстырылады, бұл қаланың орталық аудандарын, оның ішінде маңызды нысандарды газбен үздіксіз қамтамасыз етеді.
Сонымен қатар, кестеге сәйкес жылу беру маусымына дайындық жұмыстары жүргізілуде. Бүгінгі күні дайындық 95 пайызды құрайды.
Айта кету керек, «QazaqGaz Aimaq» АҚ Ақтөбе өндірістік филиалы 5,9 мың шақырым тарату желілерін басқарады.
