Алматыда KIOGE халықаралық көрмесі жалғасуда. Бүгін "Газ және газ химиясы: құндылықты қайта бөлу стратегиясы" сессиясы аясында "QazaqGaz "ҰК" АҚ Басқарма төрағасының барлау және өндіру жөніндегі орынбасары Асылжан Дәулетов сөз сөйледі. Ол компанияның ағымдағы геологиялық барлау қызметі, жаңа аумақтарды зерделеу перспективалары және халықаралық инвесторларды тарту туралы айтып берді.
Ағымдағы жылы QazaqGaz жер қойнауын геологиялық зерттеуге үш лицензия алды. Олар Каспий маңы ойпатының, Шу-Сарысу және Теңіз бассейндерінің орталық геоблок аумақтарын қамтиды.
Жыл соңына дейін компания геологиялық барлау жұмыстарын бастауды жоспарлап отыр. Үш лицензия шеңберінде шамамен 6 150 километр 2D-сейсмикалық барлау және 126 мыңға жуық цифрлық геохимиялық түсірілім нүктелерін жүргізу көзделген.
"Бүгінгі таңда айтарлықтай дайындық жұмыстары жүргізілді: сейсмикалық профильдер мен геохимиялық зерттеулер желісі жоспарланған. Келесі кезең-дала жұмыстарын жүргізу, алынған деректерді өңдеу және кешенді түсіндіру", - деп атап өтті Асылжан Дәулетов.
Оның айтуынша, QazaqGaz геологиялық белгісіздіктерді дәйекті төмендетуге бағытталған кешенді тәсілді қолданады. Сейсмикалық барлау, геохимиялық зерттеулер нәтижелерін және қолда бар геологиялық-геофизикалық ақпаратты талдау бассейндердің құрылымын нақтылауға, перспективалы аймақтарды айқындауға және кейінгі іздестіру-барлау жұмыстары үшін объектілер портфелін қалыптастыруға мүмкіндік береді.
Компания сондай-ақ ұзақмерзімді перспективада ресурстық базаның өсуін қамтамасыз ете алатын аз зерттелген аумақтардағы қызметті кеңейтеді. Бұл ретте лицензия алу немесе сейсмикалық барлау жүргізу кен орнын ашуды білдірмейді. Перспективалы объектілер ресурстарды, геологиялық тәуекелдерді және экономикалық тиімділікті бағалау кезеңдерінен өтуі керек, содан кейін олардың ең тартымдылары егжей-тегжейлі зерттеулер мен бұрғылау үшін ұсынылады.
Сөз сөйлеу барысында инвестицияларды тартуға ерекше көңіл бөлінді. Бүгінгі таңда QazaqGaz геологиялық портфеліне Қазақстанның түрлі өңірлерінде орналасқан 28 учаске кіреді.
Компания жобалардың техникалық презентацияларын өткізеді, әлеуетті серіктестерге перспективалы газ учаскелері туралы ақпарат жібереді, өзара іс-қимыл туралы алдын ала келісімдерге қол қояды және геологиялық барлау жұмыстарын бірлесіп іске асыру мен қаржыландырудың әртүрлі модельдерін талқылайды.
"Біз қазіргі серіктестермен де, жаңа инвесторлармен де ынтымақтастыққа дайынбыз. Біз үшін Қазақстанның ресурстық әлеуетін, инвестициялар мен заманауи технологияларды біріктіретін ұзақмерзімді серіктестіктерді қалыптастыру маңызды", - деп атап өтті Асылжан Дәулетов.
