Жұмысшы мамандықтар жылы аясында "QazaqGaz "ҰК" АҚ Басқарма Төрағасы Санжар Жаркешов "Интергаз Орталық Азия" АҚ "Жезқазған"магистральдық газ құбырлары басқармасының (МГҚБ) қызметкерлері үшін заманауи вахталық қалашық құрылысына инспекция жасады.
Жоба "Сарыарқа" магистральдық газ құбыры учаскесіне, сондай-ақ "Жезқазған"автоматтандырылған газ тарату станциясына қызмет көрсететін персоналдың әлеуметтік-тұрмыстық жағдайларын едәуір арттыруға бағытталған.
"Біз үшін басты құндылық - адам ресурсы", – деді QazaqGaz басшысы. - Мен қызметкерлеріміздің еңбек жағдайларымен жеке танысып, жасалып жатқан дүниелердің әлемдік стандарттарға сай болуын тапсырдым. Инфрақұрылым әрбір газ маманына қамқорлықпен жасалуы тиіс".
Бір мезгілде Теміртаудағы персоналға арналған заманауи вахталық қалашықтың күрделі құрылысы, сондай-ақ Атырау қаласындағы жатақхананы күрделі жөндеу бойынша жобалар іске асырылуда. Биыл сомасы 2,7 млрд теңгенің 47 объектісін жөндеу жоспарланған, олардың ішінде жуынатын бөлмелер, спорт залдары және санитарлық-тұрмыстық ғимараттар бар.
Жұмысшы мамандықтары жылы аясында компания сонымен қатар кадрларды оқыту және дамыту бойынша жобаларды белсенді түрде іске асыруда: 5,5 мыңнан астам қызметкер жұмысшы мамандықтары бойынша қайта даярлаудан және оқытудан өтті. Жыл сайынғы "Үздік маман" байқауы үздік мамандарды анықтауға және оларды жалақыға қосымша үстемеақылармен ынталандыруға мүмкіндік береді.
Сонымен қатар, QazaqGaz университеттермен және колледждермен ынтымақтастықты нығайтуда. Жүзден астам студент компанияның өндірістік объектілерінде тәжірибеден өтті, ынтымақтастық туралы 30-дан астам келісімге қол қойылды, бұл саланың болашақ кадрлық резервін қалыптастырады.
2025 жылы QazaqGaz 25 жылдығын атап өтеді және мереке қарсаңында газ саласының 2,5 мыңнан астам қызметкері мен ардагерлері марапаттарға ие болады, ал өңірлерде газ қызметкерлерін құрметтеу үшін салтанатты іс-шаралар өтеді.
